ئێحزار و بازداشتی سێ هاوڵاتی هۆگری ئایینی یاری له‌ كرماشان و هه‌مه‌دان

705
دوو هاوڵاتی هۆگری ئایینی یاری له‌ ماوه‌ی رۆژانی رابردوودا له‌ شاری هه‌مه‌دان ده‌ستبه‌سه‌ر كران و هاوكات هاوڵاتییه‌كی دیكه‌ی ئایینی یاری له‌ لایه‌ن وه‌زاره‌تی ئیتلاعاتی رژیم له‌ شاری كرماشان بانگ كرا.
به‌ پێی راپۆرتی كۆمه‌ڵه‌ی هه‌ڵسووڕاوانی مافی مرۆڤ له‌ ئێران، ئه‌مین ئیهاوه‌ند و هاوسه‌ره‌كه‌ی “موژگان عه‌باسی باشی” له‌ هۆگرانی ئایینی یارسان، رۆژی چوارشه‌ممه‌ ٢٩ی مانگی ره‌زبه‌ر له‌ به‌رده‌م دانیشگای بوعه‌لی هه‌مه‌دان ده‌ستبه‌سه‌ر كران. به‌ وته‌ی شاهیدانی عه‌ینی، مه‌ئمورانی ئه‌منیه‌تی له‌ حاڵێكدا كه‌ بیسیم و ته‌یاری به‌ چه‌كی كه‌مه‌ری بوون، ئه‌م ژن و مێرده‌یان به‌ شێوه‌یه‌كی زۆر وه‌حشیانه‌ سه‌واری ئۆتۆمبیله‌كه‌یان كرد و بڵاوه‌یان به‌ خه‌ڵكی حازر له‌ شوێنی رووداوه‌كه‌ كرد. شایانی باسه‌ هێشتا له‌ هۆكاری بازداشت، شوێنی راگیران و بارودۆخی ئه‌و دوو هاوڵاتییه‌، زانیارییه‌ك له‌به‌رده‌ستدا نییه‌ و سه‌ردانی بنه‌ماڵه‌كانیان بۆ ناوه‌نده‌ قه‌زایی ئینتزامییه‌كانی رژیم هیچ ئاكامێكی نه‌بووه‌. هاوكات له‌ ماوه‌ی رۆژانی رابردوودا جه‌هانگیر سه‌لیمی له‌ هه‌ڵسووڕاوان و پشتیوانانی ته‌ریقه‌تی یارسان، له‌ لایه‌ن ئیداره‌ی ئیتلاعاتی كرماشانه‌وه‌ بانگ كراوه‌. جه‌هانگیر سه‌لیمی ساڵی رابردووش ده‌ستبه‌سه‌ر و چه‌ندین مانگ له‌ زیندان راگیرابوو و دواتر به‌ قه‌راری وه‌سیقه‌ به‌ شێوه‌ی كاتی ئازاد كرابوو. شایانی باسه‌ ماوه‌ی ئه‌م ساڵانه‌ی دواییدا ژماره‌یه‌كی زۆر له‌ هۆگرانی ئایینی یاری له‌ لایه‌ن ناوه‌نده‌ ئه‌منیه‌تی و قه‌زاییه‌كانی رژیمه‌وه‌ بانگ یان ده‌ستبه‌سه‌ر كراون یان هه‌ڕه‌شه‌ی بێبه‌ش كران له‌ مافی شارۆمه‌ندیان لێكراوه‌.