ئێعدامی زیندانییه‌ك و گواستنه‌وه‌ی نۆ زیندانی دیكه‌ بۆ ژووری تاكه‌كه‌سی

937
به‌ پێی راپۆرتی هێرانا، زیندانییه‌ك له‌ زیندانی عادڵ ئابادی شیراز ئێعدام كرا و لانیكه‌م نۆ زیندانی مه‌حكوم به‌ ئێعدامی دیكه‌ بۆ به‌كرده‌وه‌ ده‌رهێنانی حوكم، راپێچی ژووری تاكه‌كه‌سی زیندانی ره‌جایی شاری كه‌ره‌ج كران.
به‌ پێی ئه‌م راپۆرته‌، رۆژی دووشه‌ممه‌ ١٣ی ره‌زبه‌ر زیندانییه‌ك له‌ زیندانی عادڵ ئابادی شیراز به‌ تۆمه‌تی “قه‌تڵ” ئێعدام كرا. هه‌روه‌ها سه‌رله‌به‌یانی رۆژی سێشه‌ممه‌ ١٤ی مانگی ره‌زبه‌ر، نۆ زیندانی بۆ به‌كرده‌وه‌ ده‌رهێنانی حوكمی ئێعدام، راپێچی ژووری تاكه‌كه‌سی زیندانی ره‌جایی شار كران. به ‌وته‌ی كاربه‌ده‌ستانی قه‌زایی رژیم، ئه‌م زیندانیانه‌ به‌ تۆمه‌تی “قه‌تڵی عه‌مد” به‌ ئێعدام مه‌حكوم كراون و بڕیاره‌ حوكمه‌كه‌یان سه‌رله‌به‌یانی رۆژی چوارشه‌ممه‌ له‌ زیندانی ره‌جایی شار، به‌كرده‌وه‌ ده‌ربێت. له‌ لایه‌كی دیكه‌وه‌ هاوكات هه‌ر له‌م رۆژه‌دا چوار زیندانی به‌ تۆمه‌تی هاوشێوه‌ له‌ زیندانه‌كانی ئیسفه‌هان، هه‌مه‌دان و زیندانی ناوه‌ندی ته‌ورێز به‌ ره‌زایه‌تی بنه‌ماڵه‌‌ی كوژراوه‌كان‌، له‌ مه‌رگ رزگار كران.