به‌ردەوامیی مانگرتنی به‌کۆمه‌ڵی که‌مپینی هاواری “کانی بڵ”

948
له‌ درێژەی کارو چالاکیی ژینگه‌پاریزانی رۆژهه‌ڵاتی کوردستان بۆ رزگارکردنی “کانی بڵ” له‌ وشکبوون،٩ كه‌س له‌چالاكانی ژینگه‌پارێزی، که‌مپینی “هاواری کانی بڵ” مانیان له‌خواردن گرتوە.
دوای ئه‌وەی زیاتر له‌ سێ هه‌زار که‌س له‌ چالاکانی مه‌دەنی، ژینگه‌پارێز، سیاسی، عه‌قیده‌تی ‌و زانستی و فه‌رهه‌نگیی رۆژهه‌ڵاتی کوردستان به‌ نووسینی نامه‌یه‌ک ناڕه‌زایه‌تی خۆیان سه‌باره‌ت به‌ژێرئاوكه‌وتنی کانی بڵ به‌هۆی ئاوگیریی به‌نداوی داریان به‌ نوێنه‌رانی مه‌جلیس‌ و سه‌رۆك کۆماری ئێران ڕاگه‌یاندوه‌ داواکه‌یان پشتگوێ خرا؛ ئه‌و که‌مپه‌ینه‌ چالاکی‌یه‌کانی خۆی به‌ مه‌به‌ستی پێشگیری له‌ وشکبوونی کانی بڵ په‌رە پێدا. به‌ پێی دوایین زانیاری‌یه‌کان تا ئێستا ٩ که‌س له‌ چالاکانی مه‌دەنی‌و ژینگه‌پارێز به‌ ناوەکانی میعاد ئه‌حمه‌دی، سوهه‌یلا محه‌ممه‌دی، ئازاد عه‌باسی، سابیر سوڵتانی، نیعمه‌ت رەزایی، سیروان رەحیمی، خه‌بات مه‌فاخری، پێژمان سوبحانی‌و هێمن محه‌ممه‌دی مانیان له‌ خواردن گرتوە و به‌م چه‌شنه‌ ناڕەزایه‌تی خۆیان به‌م کاره‌ساته‌ ژینگه‌ییه‌ راگه‌یاندوه‌.
“کانی‌بڵ” کانییه‌کی سروشتی‌ له‌ نزیكی گوندی ھه‌جیجه‌ که‌ له‌ کێوەکانی شاھۆوە سه‌رچاوە دەگرێ و یه‌کێ له‌ پڕئاوترین کانییه‌کانی کوردستان. کانی‌بڵ له‌ چركه‌یه‌كدا سێ تا چوار ھه‌زار لیتر ئاوی ھه‌یه‌ و دەتوانێ ئاوی خواردنه‌وەی دوو میلیۆن که‌س دابین بکا.