داوای ده‌ركردنی وه‌زیرانی هه‌ده‌په‌ له‌ حكومه‌تی توركیه‌

469
وەزیرى ڕۆشنبیرى و گەشتوگوزارى حکومەتى کاتیى تورکیه‌ داواى لە سەرۆک وەزیرانى تورکیا کرد وەزیرەکانى هەدەپە بەهۆى سەردانکردنیان بۆ شارى جزیرە، لە حکومەتى تورکیه‌ دەربکرێن.هه‌ر له‌م پێوه‌نده‌دا رۆژی سێشه‌ممه‌ وەزیرى هەدەپە بۆ کاروبارى ئوروپا لە حکومەتى تورکیه،‌ بە رۆژنامەى جمهوریەتى وتووە “وەزیرى رۆشنبیرى و گەشتوگوزارى حکومەتى کاتیى تورکیه‌ مافى داوایەکى لەو شێوەیەی نییە”. ناوبراو سه‌باره‌ت به‌ سەردانەکەى بۆ شارى جزیرە بەم رۆژنامه‌ی راگه‌یاندووه‌ “ئێمە سەردانى شارێکمان کردووە کە ١٢٠ هەزار دانیشتووى هەیە و بارى نائاسایى بەسەردا سەپێنرابوو و ویستمان ئاگادارى ئەو پێشێلکارییە یاساییانە بین کە لەوێ روودەن و ئەوەش بۆ ڕاى گشتى بڵاو بکەینەوە”. شایانی باسه‌ شارى جزیرە لە ئۆستانی شێرناخ له‌ رۆژى ٤ی سپتامبره‌وه‌ تا ٨ی سپتامبر بارودۆخی نیزامی تێدا راگەیەندرا و لەو ماوەیەدا سپا و پۆلیسى تورکیه‌ شارەکەیان گەمارۆدابوو كه‌ به‌ هۆیه‌وه‌ ٢٣ هاووڵاتیى ئەو شارە گیانیان له‌ده‌ستدا. جێگای وه‌بیرهێنانه‌وه‌یه‌ كه‌ پاش ئه‌وه‌یكه‌ سپا و پۆلیسى تورکیه‌ گەمارۆیان لەسەر شارۆچکەى جزیرە هەڵگرت، رێكه‌وتی یه‌كشه‌ممه‌ ٢٢ى مانگی خه‌رمانان هەزاران هاوڵاتیى ئەو شارۆچکەیە تەرمى کەسوکارەکانیان له‌ رێوڕەسمێکى جەماوەریدا بە خاکسپارد. به‌ پێی راپۆرتی سه‌رچاوه‌كانی هه‌واڵ، له‌م رۆژه‌دا ١٦ هاووڵاتیى شارۆچکەى جزیرە کە کۆرپەیەکى ٣٥ رۆژەش یەکێک لە کوژراوەکان بوو، لەلایەن هەزاران هاوڵاتیى شارۆچکەکە و نوێنەرانى هەدەپە و دەبەپە و رێکخراوەکانى کۆمەڵەى مەدەنى، بە خاک سپێردران.