راگەیاندنی دوو ناوەندی پارێزەری مافی مرۆڤ لەبارەی كوشتاری كۆڵبەران

605t
دوو ناوەندی ئێرانی پارێزەری مافی مرۆڤ لە به‌یانییه‌كی هاوبەشدا، كوشتاری رۆژانه‌ی كۆڵبه‌ران له‌ سه‌ر سنووره‌كان به‌ده‌ستی هێزه‌كانی رژیمیان مه‌حكوم كردلەم راگه‌یاندنه‌دا هاتووە: بەهۆی هەژاری ‌و بێکاریی زۆر له‌و ناوچانه‌ رووتێكردنی خەڵكی ناوچە سنوورییەكان لە كاری مەترسیداری كۆڵبەری زۆر بووه‌ و له‌لایه‌کی دیکه‌ش كوشتاری ئەم چینە هەژارە هەموو رۆژێك بەردەوامە، به‌ڵام ئه‌م تراژیدییانه‌ له‌لایه‌ن پارێزەرانی مافەكانی مرۆڤ و رێكخراوە سیاسییەكانیش که‌متر گرینگییان پێدراوه‌ و ئه‌و کاره‌ساتانه‌ له‌ کوردستان بۆتە مەسەلەیەكی ئاسایی و رۆژانە، وه‌كوو ئه‌وه‌ كە گیان و ژیانی ئەم خەڵكە بێتاوانە هیچ نرخێكی نه‌مابێ. ئەوان هەروه‌ها لە بوونی پارێزەر و پشتیوانێكی دڵسۆز بێبەشن. كانوونی بەرگری لە مافی مرۆڤ لە ئێران و كومیتەی بەرگری لە مافی نەتەوەكان لە ئێران دەڵێ بە بۆنەی “هه‌فته‌ی پارێزەر” لە سنە كۆبوونەوەیەك “لەژێر ناوی كوشتاری كۆڵبەران” بەڕێوەچوو كە بەداخەوە لە لایەن دادستانی شاری سنەوە بەڕێوەبەرانی ئەم كۆڕە بە تاوانبار لە قەڵەم دراون. ئەندامانی كومیتەی بەرگری لە مافی نەتەوەكان بۆ جارێكی دیكە وێڕای مەحكوم كردنی ئەم جۆرە كردەوە نامرۆڤانانەی رژیمی كۆماری ئیسلامی، سەرنجی تەواوی كۆمەڵگای نێودەوڵەتی و دامەزراوەكانی مافی مرۆڤ بۆ دژكردەوە نیشان دان بەم شێوە كاركردە راكێشاوە و بە مەبەستی راگرتنی کوشتار و بریندار كردنی كۆڵبەران، داوای یارمەتییان كردووە.