راگەیاندنی کومیتەی ناوەندیی حێزبی کومونیستی ئێران بە بۆنەی ١٦ی سەرماوەز رۆژی دانشجوو

لە بارودۆخێکدا لە ١٦ی سەرماوەز نزیک دەبینەوە کە نزیکەی دوو ساڵ و نیو بەسەر هاتنەسەر کاری دەوڵەتی “تەدبیر و ئومید”ی حەسەن رۆحانیدا تێدەپەڕێت. دەوڵەتی ئیعتیدال بەڵێنی دابوو کە بە باشتر بوونی مناسبات لەگەڵ رۆژئاوا، وه‌زعی ژیان و بەڕێچونی کرێکاران باشتر دەکات. بەڵام ئێستا جار له‌گه‌ڵ جار روون بۆتەوە کە دوای تەوافوقاتی هەستەیی و بە کۆتایی هاتنی ته‌حریمه‌ ئابوورییەکانیش باشتر بوونێکی راستەقینە لە ئاستی ژیان و بەڕێچوونی کرێکاران و توێژی هەژاری کۆمەڵگەدا بەدی نه‌هاتووه‌. له‌ ئێران وه‌ها كه‌له‌له‌رێكی قووڵ، ئاستی هه‌قده‌ستی كرێكاران و حقوقی مۆعه‌لێمان و كارمه‌ندان له‌ تێچووی دابینكردنی ژیانێكی مرۆیی و ته‌نانه‌ت له‌ هێڵی هه‌ژاریی جیاده‌كاته‌وه‌ كه‌ لاچوونی ته‌حریمه‌كانیش ئه‌م وه‌زعه‌ كاره‌ساتباره‌ی پێ ناگۆڕدرێت.
598

بەپێی ئۆلگوی تەوسعەی جێی سرنجی دەوڵەتی رۆحانی بڕیاربوو لە ئه‌نجامی پەرەپێدانی خوسوسی سازییەکان و راکێشانی سەرمایەی دەرەکی و بەرهەمهێنان بۆ هەناردە کردن و رقابەت لە بازاڕە نێونەتەوەییەکاندا زەمینەی رەونەق و گەشەی ئابووری فەراهەم بێت. بەڵام بە سه‌رنجدان بەم راستیەی کە ئێستا زیاتر لە ٥٠ لەسەدی کارخانە و ناوەندە پێشەسازیەکانی ئێران بەهۆی کۆنە بوونی ماشێنەکانیان داخراون یان لەخوار زەرفیەتی خۆیانەوە بەرهەمدێنن، گەڵاڵەدارێژەرانی ئەم سیاسەتە بەفەرزی لاچوونی کۆسپە سیاسی و ئیدئۆلۆژیکەکانیش، بە هۆی مەحدودیەتی فەننی و تێکنولۆژی و لاوازی ژێرخانی ئابووریی ناتوانن بە پشت بەستن بە بەرهەمهێنان و هەناردە کردنی کالا سەنعەتیەکان و رقابەت لە بازاڕە جیهانیەکاندا ئاسۆی گەشەی ئابووری بە رووی سەرمایەداری ئێراندا بکەنەوە. لەم روەوە بەرنامە ئابووریە درێژماوەکانی دەوڵەتی رۆحانی، یان مۆدێلێک کە بۆ گەشەی ئابووری ئێرانیان لەبەرچاو گرتووە، ئه‌نجامه‌كه‌ی توند بوونەوەی چەوسانەوەی هێزی کاری هەرزانی ئێران، لەخوارەوە راگرتنی ئاستی حەقدەستەکان و بێکاری بەرین ترە. کۆماری ئیسلامی و چینی سەرمایەداری ئێران دەیانەوێ بە پێ خستنەسەر ملی کرێکارانی ئێران زیان و خەسارەتەکانی دەورەی ته‌حریمه‌كان قەرەبوو بکەنەوە.بەڵام لەسەر به‌ستێنی ئەم هەژاری و فەلاکەتە بێ وێنەیە، خەباتی سینفی کرێکاران بێوچان درێژەی هەبووە. لە ماوه‌ی یەکساڵی رابردوودا تەقریبەن هیچ رۆژێک نەبووە کە شایه‌تی چەند ناڕەزایەتی و مانگرتنی کرێکاری نەبووبێتین. لەم یەک ساڵەی دواییدا رێژه‌ی ناڕەزایەتی و مانگرتنە کرێکارییەکان و ژمارەی کرێکارانی بەشدار لەم خەباتانەدا، بە بەراورد له‌گه‌ڵ ساڵی رابردوو هه‌ڵكشاوه‌ و ئەم خەباتە کرێکاریەی ئێستاكه‌ لە ئارادایە، لەم مانگ و هەفتانەی دواییدا پیشانده‌ری ئه‌وه‌یه‌ کە ئەم رەوتە درێژەی هەیە. خەباتی کرێکارانی ئێران لەم دەورەیەدا و لەسەر ناوەرۆکی توند بوونەوەی هەژاری و فەلاکەتی ئابووری و درێژەی سەرکوت و گرتن و زیندانی کردنی هەڵسوڕاوانی لە جەریاندایە. داسەپاندنی حەقدەستی سێ جار لەژێر هێڵی هەژاریدا، رەواجدان بە قەراردادی کاتی و سپی ئیمزا، سەرهەڵدانی شیرکەتە پەیمانکاریەکانی دابین کردنی كرێكار کە بەشێک لە هەقدەسته‌كانیان بە تاڵان دەبەن، ده‌رهاویشتنی بەشێکی بەرین لە کرێکارانی ئێران لە ژێر چەتری قانونی کار و بێکارسازییە بەرینەکان، بە ئاشكراترین شێواز مەوقعیەتی دژواری چینی کرێکاری ئێران پیشان ئەدات. بەمجۆرە بزوتنەوەی کرێکاری زیندووترین بزوتنەوەی حازر و ئامادەی ناو مه‌یدانی خه‌باته‌.لە بارودۆخێکدا کە بزوتنەوەی موتالباتی کرێکاران سەرەڕای پڕژوبڵاوی و هه‌بوونی سەرکوتگەری و هه‌روه‌ها هەوڵەکانی دەوڵەتی رۆحانی و لایەنگرانی بۆ تووشی رکود کردنی ئەم خەباتە، هەروا درێژەی هەبووە و زەمینەی بۆ گێڕانی دەور و نەقشی هەڵسوڕاوانی سوسیالیستی بزوتنەوەی کرێکاری فەراهەم کردووە، پێویستی واوه‌تر چوونی خەباتی خوێندکاری لە ویست و داواکارییە سینفیەکانی کردۆتە پێویستیەکی سیاسی. ناڕەزایەتی خوێندکاریی لە ئێستادا زۆربه‌ی لەدەوری داواکارییە سینفیەکان ده‌بیندرێت، لە حاڵێکدا کە گێڕانی دەوری پێشڕەوانەی بزوتنەوەی خوێندکاری لە کۆمەڵگایەکی پڕ لە ئیختیناقی وەک ئێران، لە گرەوی ئەوەدایە کە داواکاریە دیموکراتیکەکانی مەوجود لە ئاستی کۆمەڵگادا بە شێلگیرانەترین شێوە بناسرێن و پشتیوانیان لێ بکرێت. لەم بارودۆخه‌ی ئێستادا تێکشکاندنی فەزای ئەمنیەتی زاڵكراو به‌سه‌ر زانكۆكان، بەرەنگاریكردنی سیاسەتی هەڵاواردنی رەگەزی، پاشەکشە کردن بە سیاسەتی ئیسلامی کردنی دانیشگاكان و بەرگرتن لە خسوسی سازی ناوەندە دانشگاییەکان لە سۆنگه‌ی واوه‌تر چوون لە داواکارییە سینفیەکان و هه‌روه‌ها به‌ خەبات بۆ دەستەبەر کردنی داواکاری دیموکراتیک ده‌ستبه‌به‌ر ده‌بێت. ئەو داواکارییە دیموکراتیکانەی ره‌گوریشه‌ی له‌ قووڵایی و ناخی كۆمه‌ڵگای ئێراندایه‌، هەمان ئەو داواکاریانەن کە لە لایەن بزوتنەوە پێشڕەوە کۆمەڵایەتیەکانی وەک بزوتنەوەی کرێکاری، بزووتنه‌وه‌ی ژنان و بزوتنەوەی شۆڕشگێڕانەی کوردستانەوە لە بۆنەی جۆراوجۆردا گه‌ڵاڵه‌ کراون و لە کرداری خەباتکارانەدا پەیگیری دەکرێن. داواکارییەکانی وەک ئازادی راده‌ربڕین، ئازادیی پێکهێنانی تەشەکۆل، جیایی “دین” لە دەوڵەت و ئاموزش و پەرەوەرش، کۆتایی هێنان بە سیاسەتی ئاپارتایدی رەگەزی، کۆتایی هێنان بە ستەمگەری نەتەوایەتی و باقی داواکارییە دیمۆکراتیکەکان لە ئاستی کۆمەڵگه‌دا دەبێ له‌ حه‌ره‌كه‌تی ئێعترازی و خه‌باتكارانه‌ی خوێندكاراندا ره‌نگ بداته‌وه‌. هەڵسوڕاوانی کومونیستی بزوتنەوەی خوێندکاریش بە هەوڵدانی شێلگیرانە بۆ هێنانەگۆڕ و دەستەبەر کردنی ئەم داواکاریانەیە کە دەتوانن لەگەڵ هەڵسوراوانی رادیکاڵی بزوتنەوەی کرێکاری و باقی بزوتنەوە پێشڕەوە کۆمەڵایەتیەکان پێوەندی قووڵ دابمەزرێنن.مه‌یلی سۆسیالیستیی ناو بزوتنەوەی خوێندکاریش ره‌گوریشه‌ی لە زیاتر لە ٦٠ ساڵ حوزوری مەعنەوەی، سیاسی و سازماندەرانەی کومونیستەکانی ئه‌م كۆمه‌ڵگه‌یه‌دایه‌. ئەم حەرەکەتە بە سرنجدان بە پێشینە و نەقش و پێگەیەک کە لە خاڵە پۆزەتیڤە مێژوییەکان لە ئێراندا هەیەتی، دەتوانێ داواکارییەکانی لەگەڵ ئەو داواکاریانە کە ریشەیان لە ناخ و قووڵایی کۆمەڵگه‌ و خەباتی کرێکاران، ژنان و زۆربەی بێبەشانی کۆمەڵگەدایە هاوئاهەنگ بکات. لە حاڵێكدا کە هەڵسوڕاوان و لایەنگرانی ئیسلاح خوازانی حکومەتی لە کێشمەکێش لەگەڵ ناوەندەکانی سەربە ئوسول گەراکاندا هه‌وڵ بۆ ئه‌وه‌ ده‌ده‌ن کە بزوتنەوەی خوێندکاریی بكه‌نه‌ پاشكۆی دەوڵەتی رۆحانی و داواکاری و خەباتی ئەوان لە چوارچێوەی قانونی ئیسلامیدا قەتیس بکەن، مه‌یل و گه‌رایشی کومونیستی دەتوانێ بە پشت بەستن بە سوننەتی پێشڕەو و شۆڕشگێڕانە ببێتە ئاڵاهەڵگری بزوتنەوەی خوێندکاری. بۆ هەڵسوڕاوانی رادیکاڵ و سوسیالیستی بزوتنەوەی خوێندکاریی ١٦ی سەرماوەزی ئەمساڵ دەتوانێ فورسه‌تێكی باش بێ بۆ دەنگدانەوەی عەزمی لێبڕاوانه‌یان بۆ هەڵکردنی ئاڵای ئازادیخوازی و بەرابەری تەڵەبی لە دانیشگاكان و کۆمەڵگه‌دا.

پیرۆز بێت ١٦ ی ئازه‌ر رۆژی دانشجوو
بروخێ رژیمی کۆماری ئیسلامی
بژی ئازادی، بەرابەری، حکومەتی کرێکاری

کومیتەی ناوەندیی حێزبی کومونیستی ئێران
١٣ی سەرماوەزی ١٣٩٤
٤ی دسامبری ٢٠١٥