رێزگرتن له‌ یادی قوربانییانی هێرشه‌كانی تێرۆریستیی له‌ بروكسێل

135
زیاد له‌ هه‌زار كه‌س له‌ دانیشتوانی شاری بروكسێل بۆ رێزگرتن له‌ یادی قوربانییانی هێرشه‌ خۆكوژییه‌كانی هه‌فته‌ی رابردوو له‌ فڕۆكه‌خانه‌ و مێترۆ، له‌ مه‌یدانی سه‌ره‌كیی ئه‌مشاره‌ كۆبوونه‌وه‌.
هاوكات سه‌دان كه‌س له‌ راستگه‌رایان كه‌ دمووچاویان به‌ ده‌مامه‌ك داپۆشیبوو، به‌ ئاماده‌ بوون له‌ ناوه‌ندی شاری بروكسێل، چه‌ندین درووشمیان له‌ دژی كۆچبه‌ران و مۆسڵمانان وته‌وه‌. ده‌وڵه‌تی بێلژیك، خۆپیشاندان و رێپێوانی به‌ربڵاو كه‌ بۆ رۆژی یه‌كشه‌ممه‌ به‌رنامه‌رێژی بۆ كرابوو دواده‌خات. ئه‌م رێپێوانه‌ بڕیاروابوو بۆ رێزگرتن له‌ یادی قوربانییان و به‌ نیشانه‌ی خۆڕاگریی شارۆمه‌ندانی بێلژیك له‌ به‌رامبه‌ر ئه‌و فه‌زای ترس و وه‌حشه‌ته‌ پێكهاتووه‌دا به‌ڕێوه‌بچێت. جێگه‌ی وه‌بیرهێنانه‌وه‌یه‌ له‌ دوو هێرشی خۆكوژیی هه‌فته‌ی رابردوو له‌ مێترۆ و فڕۆكه‌خانه‌ی بروكسێل، لانیكه‌م ٣١ كه‌س گیانیان له‌ده‌ستدا و ده‌وری ٣٠٠ كه‌سیش بریندار بوون. گرووپی ئیسلامگه‌رای “داعش” به‌رپرسیاره‌تیی ئه‌م هێرشانه‌ی وه‌ئه‌ستۆ گرتووه‌.