هێرشی مه‌ئمورانی شاره‌داری ئیلام بۆسه‌ر ده‌ستفرۆشان

414t

به‌ پێی راپۆرته‌كان، رۆژی شه‌ممه‌ ٢ی مانگی ره‌شه‌ممه‌ مەئموورانی شاره‌داری ئیلام هێرشیان كرده‌ سه‌ر ‌دەستفرۆشانی ئه‌م شاره‌.
به‌ پێی راپۆرته‌كان، مەئمورانی شاره‌داری هاورێ لەگەڵ هێزە ئینتزامییەکان کە گازی فرمێسکڕێژ و باتۆمی برقییان پێ بوو‌، هێرشیان کردە سەر دەستفرۆشەکانی کۆڵانی ئیدارەی رێگەوبانی شاری ئیلام و دەستیان كرد به‌ ئەزیەت و ئازار و راوەدوونانی دەستفرۆشان. له‌و نێوه‌دا پیرەپیاوێکی دەستفرۆش کە چەند کراسێکی بۆ فرۆشتن پێبووه‌، لەلایەن مەئموورانەوە دەستبەسەر كراوه‌ و سەرەڕای ئەوەش مەئموورانی شاره‌داری و ئینتزامی وێڕای لێدان و سوكایه‌تی پێكردن، خستویانه‌ته‌ نێو زێرابی شەقامی فیردەوسی و ئەگەر چەند لاوێک یارمەتییان نه‌دابایه‌، هه‌ر له‌وێ دەخنکا. شایانی باسه‌ له‌ ئێرانی ژێر ده‌سه‌ڵاتی رژیمی كۆماری ئیسلامی، ده‌ستفرۆشان به‌ هۆی شه‌پۆلی له‌ڕاده‌به‌ده‌ری بێكاری و نه‌بوونی هه‌لی كاری گونجاو و نه‌بوونی داهاتێكی ئه‌وتۆ كه‌ بتوانن بژیویی ژیانی خۆیان و بنه‌ماڵه‌كانیان دابین بكه‌ن، روو له‌ كاری ده‌ستفرۆشی سه‌ر شه‌قامه‌كان ده‌كه‌ن كه‌ له‌و نێوه‌دا به‌ره‌رووی ئه‌زیه‌ت و ئازاری مه‌ئمورانی رژیم ده‌بنه‌وه‌.